តាមប្រភព ដែលបង្ហើបប្រាប់ អោយសារព័ត៌មានយើងដឹងថា លោក ធីកាប៉ូ  មានទំនាក់ទំនងលោក PM ម្នាក់ក្នុងខេត្តក្រចេះ គឺជាខ្នងបង្អែកដ៏ធំ ហើយ PM រូបនោះគឺជាអ្នកនៅពីក្រោយខ្នងឡានសាំយ៉ុង ដឹកឈើជាច្រើនគ្រឿងនៅក្នុងខេត្តក្រចេះនេះដែរ។ ប្រភពដដែលបានបន្តថា លោកPM រូបនេះក៏មានឪពុក ជា PM  ដ៏ធំក្នុងខេត្តក្រចេះដែរ ដូច្នេះហើយទើបជាខ្នងបង្អែកដ៏រឹងមាំរបស់លោកធីកាប៉ូ ហើយជារៀងរាល់យប់គេឃើញមានរថយន្តទំនើបជាច្រើនគ្រឿងដឹកឈើពីខេត្តស្ទឹងត្រែង យកមកទំលាក់នៅផ្ទះលោកធីកាប៉ូ នៅបណ្តោយផ្លូវជាតិលេខ៧ចំណុចបង្គោលគីឡូលេខ ៤២៧ ក្នុងភូមិអូព្រះ ឃុំអូរគ្រៀង ស្រុកសំបូរហើយមេឈ្មួញរូបនេះដឹកបន្តចេញទៅវៀតណាមតាមច្រកកាបីស្រុកស្នួល ។ ប្រភពដដែល បានបន្តថា ឈ្មួញឈើ ឈ្មោះ ធីកាប៉ូ នេះគឺគេមិនងាយទប់ស្កាត់ទេ ព្រោះជាឆ្នាំង បាយរបស់ពួកគេ ហើយមេស្នាក់ការ ៧១០ ដែលទើបឡើងថ្មីៗក៏ជាកូនប្រុស លោកឧត្តមសេនីយត្រី សាន្ត ប៊ុនថាន ផងដែរ ប្រហែលមេស្នាក់ការថ្មី ប្រឹងប្រមូលដើម្បីដើមហើយមើលទៅទើបធ្វើជាមិនដឹងមិនឮដូច្នេះ៕